Bilang pagpahaum sa nagapaabot nga La Niña phenomenon, nag-organisa ro barangay council it andagao it mga cleanup operation agud nga mabawasan ro peligro it pagbaha sa andang lugar.
Suno kay punong barangay Juliet Melgarejo it nasambit nga lugar nga sigidas eon ro andang paglimpyo sa mga kanae ag creek may tatlong domingo ro nagtaliwan para sa tiempo it tigueuean.
Nag-umpisa eon suno kana ro andang paglibot agud nga limpyuhan ro mga baradong kanae, creek ag iba pang gina-iligan it tubi.
Dugang pa ni Melgarejo nga nagpatigayon eon sanda it declogging, pagkumpuni ag cleanup operation sa ureta creek ag mga kanae sa calachuhi road kun sa siin nagbutang sanda kara it mabahoe nga imburnal sa Ilang-ilang street.
Pahayag pa it chairman it barangay andagao nga paga-umpisahan man nanda masunod nga mga inadlaw ro cleanup drive sa mga waterways sa parte it Jaime Cardinal Sin Avenue.
Raya hay kaparte suno kana it anang programa ag proyekto nga ginbuhusan it mabahoe nga pondo makaron nga 2024 nga nakasentro sa pag-ayos sa mga drainage system ag solid waste management bangud sa naeksperyensiyahan nga grabeng pagbaha sa nasambit nga lugar.
Plano it konseho nga i-sustain ro program hasta sa 2025 agud nga mabantayan ro mga kanal ag iba pang aeagyan it tubi nga indi magbara tuga it mga ginapilak nga basura nga kaeabanan nga nagaresulta sa pag-angkon it mga pagbaha sa maabung lugaR.
Nagpangayo eon man sigon sanda it pondo nga kapin sa P10 milyon sa LGU-kalibo agud nga mabutangan it revetment wall ro andang mga creek ag iba pang water ways.
Apela man nana sa mga residente nga maging responsible sa pagpilak it mga basura bangud sa mabahoe nga epekto kara sa pagbaha.
Nauna eon nga ginpahayag it PAGASA nga magiging sigidas eon ro pag-uean sa masunod nga mga inadlaw sa pagsueod it nasyon sa tag-uean ukon wet season.
