KALIBO, Aklan— Nagplastar it tatlo nga border control checkpoints sa Barangay Arcanghel Sur sa banwa it Balete agud nga makontrol ro mas pang pagkalhit it makataeapon nga sakit it baboy nga African Swine Fever ukon ASF.
Raya hay kasunod sa ginpatigayon nga press conference kahapon, kun sa siin ginkumpirma ni Aklan Governor Jose Enrique Miraflores nga nagpositibo ro mga blood samples nga nabo-oe sa mga baboy halin sa nasambit nga barangay partikular sa Sitio Bunayag.
Ginbutangan it border control checkpoints sa mga dueunan kara pasueod sa banwa it Libacao ag Banga kun sa siin ro mga nagasueod sa lugar hay ginapaidaeum sa disinfection.
Angot kara, ginpahayag ni Mrs. Laiding Bantique, sambilog sa mga apektadong residente nga matapos nga gulpi eamang nga namatay ro anang alagang nayon ag mga orok kara ko Lunes Santo hay insigida imaw nga nag-report sa andang Municipal Agriculture Office.
Bangud nga natigayon eon nana nga maeubong ro mga namatay nga baboy, ro andang MAO hay nagbo-oe it blood samples sa mga alagang baboy it andang kaiping nga baeay ag puro nagpositibo.
Kasunod it insidente hay haeos nagpang-euya ag nagkaeamatay ro mga alagang baboy sa palibot nanday Mrs. Bantique nga ginaeakipan it ap-at nga baeay.
Ginpang-eubong man sigon tanan ro mga namatay nga baboy.
Aminado man imaw nga mag-eowas sa feeds hay ginabahugan nanda it damog ro mga alaga.
Madumduman nga nagpaguwa eon it Executive Order No. 06 series of 2023 si Balete Mayor Dexter Calizo kun sa siin, temporaryong ginabawae ro pagpaguwa it mga buhi nga baboy ukon anumang pork products halin sa andang banwa.
