NUMANCIA, Aklan — Aminado si Punong Barangay Royden Perlas it Albasan, Numancia angot sa mga nagakatabu nga serye it panakawan sa andang lugar partikular ro mga alaga ag inugbueang nga mga manok.
Sa kamatuoran suno kana hay nagtanyag eon sanda it reward money sa sin-o man nga makatau it impormasyon kon sin-o ro responsable sa nagakatabu nga panakawan.
Kadungan kara, ginlaygayan nana ro mga pumueuyu nga maging madahan ag magpabilin nga alerto sa palibot ag indi pagpabay-an ro mga gamit ag iba pang mga bagay nga may balor nga makapukaw sa atensyon it mga kawatan.
Dugang pa nana nga naka alerto ro andang barangay council kaibahan ro peace action team sa pakikipagbueuligan man sa kapulisan agud nga mabantayan ag madakpan ro mga nagahimo it krimen.
Ginkumpirma man nana nga may person of interest eon sanda sa mga nagakatabu nga panakawan sa andang lugar pinaagi sa bulig it mga CCTV camera.
