KALIBO, Aklan—Ginklaro ni Punong Barangay Juliet Melgarejo it Barangay Andagao, Kalibo nga uwa sanda nagabaton it nagapalista para sa ayuda kundi ginavalidate ro haom eon nga masterlist nga ginpanglista kato pang nagtaliwan nga bagyong Ursula.
Suno pa kana, ro mga nakabaehag nga pangaean sa masterlist hay dato ro tig-sambilog nga adtunan it barangay council ag ivalidate ro identity bangud nga may nataeopangdan nga may mga double entry.
Ro listahan hay natapos kato pang 2019 ag kon sanday sin-o dikato ro nakalista hay sanda man ro posibleng makabaton kon may igatao nga grasya ro gobyerno.
Nag-apela imaw sa mga pumueoyo nga maghueat eamang sa andang tagsa ka panimaeay bangud nga mismo sanda ro magaadto para mavalidate ro mga raya kon eksakto sa andang listahan nga ginabuytan.
Nauna eon nga nagdagsa ro mga pumueoyo sa barangay hall agud nga magpalista kasunod it ginasugid nga pagpanupod it ayuda.
