Nagapangayo it bulig sa taeatapan ni Kalibo mayor Juris Sucro ro barangay council it Andagao kasunod sa andang mabahoe nga problema sa basura.
Suno kay Punong Barangay Roselyn Dela Rosa nga ro alkalde eon lang ro andang pag-eaum nga makapahueam kanda it garbage truck agud nga mahakot ro andang basura nga nagtambak eon sa barangay.
Ginpaathag it kapitana nga nasamad ro andang garbage truck bangud eon man sa kalumaon rason nga uwa eagi nahakot ro mga basura nga nakapaguwa sa kada kalye rason nga nagtambak ro mga raya nga gin-reklamo man it mga pumueoyo.
Angot kara, nag-apela it imaw it pag-intindi ag nagpangayo it pasensya sa anang mga nasakupan bangud sa problema sa basura.
Naga-eaum ro opisyal nga mabuligan sanda it akalde it banwa ag maideyahan nga makaangkon sanda it panibag-ong garbage truck.
