KALIBO, Aklan–Uman nga naga-apela it bulig ro konseho it barangay bakhaw norte, kalibo matapos nga mag-collapse ro portion it revetment wall sa may parte it Sitio libuton B.
Suno kay punong barangay maribeth cual nga nasamad ro istraktura sa pagpanaeasa it bagyong paeng ko nagtaliwan nga dag-on kun sa siin haeos 250 meters ro kahabaon it nahalitan nga nagakinahangean it mabahoe nga pondo.
Ro lugar hay natigayon eon nga ma-inspection it lokal nga gobyerno it Kalibo ag Department of Public Works and Highways ukon DPWH-Aklan.
Apang owa pa it kasiguraduhan kon hin-uno maumpisahan ro repair bangud sa kawad-an it pondo.
Ro lugar hay may kapin sa 90 nga mga residente nga posibleng maapektuhan.
Nagaeaum ro konseho nga mataw-an eagi it aksyon ro mga resolusyon nga andang ginsumite sa mga natungdan nga ahensiya ag aklan 1st district Congressman Carlito Marquez.
Samtang, ginklaru kara nga ro nag abot nga 50 milyon pesos nga pondo nga gin-request ni Kalibo mayor Juris Sucro sa national government nga ginpaagi sa DILG-Kalibo hay para sa construction it revetment wall it sitio karomahan agud nga maprotektahan ro andang hanging bridge kamana man ro mga residente sa nasambit nga lugar.
