KALIBO, Aklan—Ginpamalibaran it barangay council it Bulwang, Numancia nga may ginapili ro andang ginataw-an it ayuda.
Suno kay barangay kagawad Jocel Templonuevo nga nasayuran nanda nga ro tanan nga mga residente it Bulwang hay naapektuhan it grabeng baha tuga it bagyong Paeng.
Gustuhon man sigon nanda nga taw-an ro tanan it food packs, apang limitado eamang ro ginpadaea kanda halin sa lokal nga gobyerno ag kay 2nd district congressman Ted Haresco.
Samtang, ginklaru pa ni templonuevo nga nagakinahangean it supporting documents ro mga maka-avail it pinansiyal nga bulig kapareho it litrato nga nagapakita it kahalitan nga gin-aywan it nagtaliwan nga kalamidad.
May kahigayunan sigon nga nabutang eon sa masterlists ro andang pangaean apang owa nakabaton it ayuda bangud sa kueang nga mga dokumento.
Samtang, ginpasiguro ni kagawad Templonuevo nga ro owa nakabaton it ayuda hay posibleng maeakip sa 2nd batch it mga beneficiaries.
