KALIBO, Aklan—Owa pa nakapasaka it kasong administratibo ro barangay council it Cupang, Banga kontra kay Punong barangay Riza Relojo kasunod it gina-alegar nga pagwaldas kara it andang pondo.
Raya hay angot sa laygay it Municipal Local Government Operations Office ukon MLGOO it Department of the Interior and Local Government ukon DILG sa banwa it Banga nga magpasaka it complaint ro konseho sa Ombudsman.
Suno kay Kagawad Emily Rentino it nasambit nga barangay nga padayun pa sanda nga nagatipon it opinyon halin sa nagkaeain-eain nga abogado.
Apang may sangka abogado nga naglaygay sigon kanda nga mas mayad nga hueaton eon lang anay ro findings it Commission On Audit ukon COA ag rekomendasyon it DILG.
Samtang, ro andang reklamo nga ginpaabot sa MLGOO banga hay ginasugid nga ginsumite eon sa provincial director it DILG aklan nga imaw ro maga-forward sa regional office.
Hasta sa makaron suno kana hay owa pa naibalik ni kapitan Relojo ro naduea nga pondo nga naga-abot sa P939,000 pesos kabaliskaran sa anang promisa nga iga-uli raya sa mas temprano nga paniempo.
Nauna kara, gin-aku ni Barangay Treasurer Lourdes Zambrona nga imaw ro nag-withdraw it nasambit nga pondo it makapilang beses sa banko ko 2021 , apang raya tanan hay anang gintau kay kapitan.
Ro anomaliya hay nadiskubre eamang ko disyembre it nagtaliwan nga dag-on.
Sa makaron hay padayun suno kana ro paglibot it andang petisyon, kun sa siin naga-abot eon sa masobra sa 230 nga residente ro nagpirma kara agud nga eubusan nga mapatalsik sa pwesto ro andang kapitan bangud sa gina-alegar nga malversation of public funds ag abuse of authority.
