KALIBO, Aklan–Ginpatawag ni Punong barangay Daisy Andrade it Estancia, Kalibo ro anang mga barangay tanod agud nga maplanuhan ag madugangan ro oras it andang pag-roving.
Raya hay kaparte it aksyon it barangay matapos ro pilang ka mga insidente nga nailista ko mga nagtaliwan nga adlaw kaeapit ro hana nga pag-hold up sa sangka boarder bandang alas-4:00 it aga-aga ko Pebrero 5 sa bahin it Capitol Site.
Ginasugid nga nagguwa para eamang kunta magbakae it kape ro biktima kat gulping may nagpaeapit kana nga sangka eaeaki nga nakasuksok it hoody ag may nakasukbit nga siyaw sa hawak.
Naghambae pa sigon ro suspek sa biktima nga itao kana ro cellphone.
Bangud sa kakueba, ginpakamayad sigon nana nga tik-euron ro suspek ag madasig nga nagdaeagan paeayo.
Gilayon man nga nagparecord sa Kalibo Municipal Police Station ro biktima.
Matapos ro insidente hay nagdesisyon eon lang imaw nga mag-uli sa anda daea it trauma nga nabatygan.
Ginpasiguro man ni Kapitan Andrade nga magahimo imaw it nagakaigo nga aksyon agud nga indi eon mauman pa ro insidente ag masiguro ro kaeuwasan it mga pumueoyo.
