KALIBO, Aklan—Nagpahayag it kahauman ro barangay council it Estancia, Kalibo engkaso nga ipatuman ro granular lockdown sa pilang lugar sa andang barangay matapos nga makalista it an-um nga positibong kaso it coronavirus disease ukon covid 19, kaibahan ro sambilog nga namatay.
Suno kay Estancia Barangay Captain Daisy Andrade nga nakibot eon lang sanda matapos nga mataeupangdan nga pila sa andang residente nga puro medical frontliners hay gin-pick-up it ambulansiya agud nga daehon sa quarantine facility.
Todo-bantay man sigon sanda sa pamilya it nasambit nga mga covid positive nga presente man nga naka-isolate sa andang natungdan nga mga baeay.
Gintaw-an sigon nana ro mga raya it food packs nga halin sa provincial government ag LGU-Kalibo.
Nag-apela man raya it kooperasyon samtang nga owa pa ro resulta it swab test it andang kapamilya.
Sa makaron hay sigidas sigon ro pag-ronda it mga barangay officials kabulig ro barangay tanod agud nga magpang-sita it mga residente partikular ro mga pamatan-on nga nagawinarang ag mga nagahampang it basketball nga owa it suksok nga face mask.
Sa makaron ro kaso sa Aklan hay naga-abot sa 76.
Sa nasambit nga numero, 37 kara ro aktibong kaso, kun sa siin ap-at ro naka-admit sa ospital, 32 ro naka-quarantine facility, sambilog ro naka home quarantine ag 35 ro nagmayad samtang nagapabilin nga ap-at ro namatay.
Sambilog ro nadugang sa listahan it bag-ong kaso nga ginaeakipann it sangka 23 anyos nga babaye halin sa banwa it kalibo nga presenteng naka-quarantine facility.
