KALIBO, Aklan–Aminado ro barangay council it Jugas, New Washington nga uman nga nagbalik ro andang dating problema sa basura sa pabaeay it national housing authority sa nasambit nga lugar.
Suno kay Punong barangay Thelma Pronton nga raya ro andang ginakalisdan makaron bangud sa kawad-an it nagakolekta it mga basura halin sa lokal nga gobyerno.
Ginpaabot eon sigon nana ro nasambit nga problema kay mayor Jessica Panambo ag ginlaygayan ro mga residente nga maghueat anay it makadali nga paniempo.
Nasayuran nga plano it LGU-New Washington nga magbakae it bag-ong dump truck para sa andang garbage collection.
Bangud sa maabu nga mga residente ro naga-istar sa pabaeay rason nga nagatambak man ro andang mga natipon nga basura.
Sa makaron hay nagpa-obra anay it manhole ukon mabahoe nga kutkot ro konseho bilang temporaryong solusyon sa problema, apang raya hay puno eon man.
Ro mga basura hay ginahakot it andang mga barangay tanod kada sabado nga adlaw sakay it sangka tricycle.
Ginasukot it limang piso ro mga residente nga nagapa-pilak it basura.
Nag apela man raya sa mga residente nga magkooperar pinaagi sa pagpatigayon it tamang segregation it basura.
Sandig sa naga-eksister nga ordinansa, bawae ro magsunog it basura sa nasambit nga banwa.
