NUMANCIA, Aklan — Kasunod it pagka-eumos it sangka 15 anyos nga binatilyo, plano it Barangay council it Navitas, Numancia nga uman nga pagapabaskugon ro andang information dissemination agud nga ipadumdum sa publiko ro angot sa peligro nga posibleng igatuga engkaso nga magpilit nga magpaligos sa bukana ag sa palibot nga area it Guibungan.
Suno kay Punong Barangay Frany Reyes it nasambit nga lugar nga mabuhay eon sanda nga nakapaguwa it padumdum sa publiko angot kara, kun sa siin sa kamatuoran hay nagbutang sanda it mga signages kabulig ro MDRRMO apang sa indi masayuran nga rason hay nagakaduea.
Sa facebook post ni Punong Barangay Reyes, ginpaabot nana nga delikado ro nasambit nga lugar bangud sa mabaskog nga sueog it tubi mag-eowas pa nga raya hay kantilado.
Madumduman nga sangka 15 anyos nga binatilyo nga residente it Brgy. Bulwang Numancia ro nag-excursion sa lugar kaibahan ro anang pamilya ag sa owa it swerte hay naeumos bandang alas-3:45 it hapon it Domingo, Mayo 3, 2026.
Ginpadumdum pa sigon sanda it pilang mga residente nga indi magpaligos sa lugar apang nagpilit rason nga natabu ro aksidente it pagka-eumos.
Haeos limang dag-on eon sigon ro nagtaliwan kat ulihi nga may naeumos sa lugar.
Samtang, plano nanda nga talakayon sa konseho ro uman nga pagbutang it nagakaigo nga signages sa lugar kamana man ro regular nga pagpadumdum agud nga malikawan ro kaparehong insidente.
Tuyo kara nga mapataas ro kasayuran it komunidad ag masiguro ro kaeowasan it tanan.
