KALIBO, Aklan–Ginpasiguro ni Punong barangay Niel Candelario it Poblacion, Kalibo nga pagataw-an nanda it igtueopangod ro problema nga gindangop it mga pumueoyo angot sa kabuhay nga paghubas it tubi-baha sa bahin it Oyo Torong Street ag iba pang kalye nga sakop it barangay.
Suno kay Kapitan Candelario nga ginpaabot eon nanda ro concern sa lokal nga gobyerno it Kalibo.
Apang, aminado man raya nga owa it supesiyente nga pondo para mataw-an it long-term solution ro sitwasyon.
Ro mahimo eamang sigon nanda makaron hay magpatigayun it temporaryo nga solusyon kapareho it pagpasuyop it tubi.
Gin-insister man kara nga kinahang-ean eon nga magpatigayun it declogging ag ayuson ro mga drainage system agud nga malimpyuhan ro aeagyan it tubi ag malikawan ro pagtipon kara sa karsada.
Nasayuran nga masami eon nga problema sa pilang ka mga area sa banwa it Kalibo ro pagtaas it tubi-baha kada naga-uean kung siin ro ginaturo nga rason kara hay ro mga drainage nga puno it eapok ag basura.
