KALIBO, Aklan—Nagahueat eon lang it direktiba ro pamunuan it barangay council it Poblacion, Kalibo halin sa Department of the Interior and Local Government ukon DILG angot sa naging mandu ni pangueong Rodrigo Duterte nga indi pagpaguwaon ro mga bukon it bakunado.
Suno kay Punong Barangay Niel Candelario nga nabalitaan eon nana ro nasambit nga panibag-ong pahayag it pangueo, kun sa siin ginmanduan kara ro mga punong barangay nga tandaan ro mga bukon it bakunadong pumueoyo sa andang nasakupan ag indi pagpabay-an nga makaguwa sa andang panimaeay agud nga indi makatuga it peligro sa iba.
Sa makaron , ro gina-obra eamang nanda hay ro padayun nga pag engganyo sa mga pumueuyu nga magpabakuna kontra covid 19 agud nga makaangkon it proteksyon kontra sa deadly virus sa atubang it paeag it omicron variant kamana man nga indi maging instrumento it pagkalhit pa gid it nasambit nga sakit.
Matsa makataeaka eon suno kana ro pabalik-balik nga sitwasyon daea it pandemya rason nga kinahangean ro kooperasyon it tanan.
Samtang, ginkalipay sigon nanda ro datos nga madali eon lang nga maabot ro herd immunity sa banwa it kalibo bangud sa maayos ag dere-deretso nga vaccination program.
