KALIBO, Aklan–Nagpaabot it pakikisimpatiya ro barangay council it Poblacion, Kalibo sa pamilya Patricio matapos ro makasueobo nga gindangatan it andang ap-at nga dag-on nga ungang eaeaki nga binawian it kabuhi matapos mabagsakan it pader it sangka abandonadong edipisyo sa M. Laserna St. Kalibo, ko Pebrero 18.
Kadungan kara, ginpahayag ni Punong barangay Niel Candelario nga nagpadaea eon imaw it mensahe sa tag-ana it natungdan nga private property para hinyuon nga ipagguba ro mga pader ag iba pang kagamitan nga posibleng magtuga it kahalitan sa iba.
Haum man sigon ro barangay nga sabton ro gastos sa pagguba it istraktura ag plano nana nga ipaayos ro perimeter fence agud owa eon it eapusan pa.
Madumduman nga samtang nagatiltil it kabilya sa pader ro 14 anyos nga magueang it biktima hay gulping bumagsak ro pader kun sa siin natimpahan ro anang manghud.
Owa sigon imaw nakasayod nga nagsueod sa kwarto it lumang bowling lane ro anang manghud ag natiempo nga nagtiltil imaw it kabilya agud nga ipangbakae it bugas.
Grabeng lastro ro naagum it unga sa tiyan nga portion nga posibleng tuga it impact it mabahoe nga pader nga bumagsak kana.
