Uman nga nagpatigayon it clearing operations ro barangay council it Poblacion Kalibo kaibahan ro iba pang natungdan nga ahensiya it gobyerno sa mga nagapangunang daeanon sa Poblacion Kalibo.
Suno kay Punong Barangay Neil Candelario nga parikular nanda nga gintutukan ro mga stalls sa may Veterans Avenue nga ginapa-rentahan it LGU-kalibo, kun sa siin pila sa andang mga gamit hay nakapwesto eon sa mismong kilid it karsada.
Mag-eowas kara, ginsaylo man it lugar ro mga street food vendors sa F. Quimpo St. agud nga malikawan ro pagdueutdutan it mga nagabakae nga nagadisturbo sa daeagan it trapiko.
Samtang, gin-abisuhan man sigon nanda ro mga nagapanag-iya it saeakyan halin sa Purok 2 hasta 5 sa C. Laserna St. Kalibo nga likawan ro illegal parking sa karsada sa lugar eabi eon kon gabi-i bilang pagpahaum sa pagtuhaw it mga emerhensiya.
Ginpanghawanan man sigon nanda ro mga nagatuga it obstruction sa mga daeanon maepit sa revetment wall sa may Aklan river.
Suno kay kapitan candelario nga tuyo it operasyon nga malimpyuhan ro mismong mga karsada agud nga maagihan it mga saeakyan ag pedestrian.
Ro aktibidad hay bilang kaparte it napundo nga clearing operations nga ginpangunahan it Department of the Interior and Local Government ukon DILG sa tiempo ni dating Pangueong Rodrigo Duterte bangud sa pagtama it pandemya.
