KALIBO, Aklan — Padayun nga naka-alerto ro barangay council it Tabangka, Numancia kontra sa sangka eaeaki nga gina-alegar nga nagpakita it anang kinatawo sa sangka residente samtang una sa pampublikong lugar .
Suno kay Punong Barangay Vilma Regalado it nasambit nga lugar nga maka-alarma ro insidente bangud nga maabu sigon sa mga inunga nanda nga estudyante hay nagabaktas kon mag-uli sa andang mga panimaeay.
Nagakabaeaka sanda sa posibilidad nga bukon eamang it pagpakita it kinatawo ro paga-obrahon it suspek kundi nga magpang-abuso sekswal.
Dugang pa ni Kapitan Regalado nga natabu ro insidente bandang alas-6:00 ko gabi-i it nagtaliwan nga Agosto 20, apang gin-report kana pasado alas-9:00 eon it gabi-i.
Gina-usoy eon sigon makaron it mga awtoridad ro suspek nga nakasakay sa motorsiklo .
Antes ro pag-atake it nasambit nga exhibitionist sa banwa it Numancia hay sangka babaye man halin sa Brgy. Cajilo ro nagdangop sa Makato Municipal Police Station bangud sa kapareho nga hitabu.
Base sigon sa panaysayon it biktima nga samtang sa terrace sa guwa it andang baeay, sangka rider ro nagpundo sa guwa it andang kurae may pilang distansiya ro andang kaeayuon kun sa siin sa owa ginaeauman, ginpaguwa kara ro anang kinatawo sa anang atubang samtang ro anang pihak nga alima hay nagabuyot it cellphone nga matsa may ginatan-aw .
Matapos ro insidente, matawhay man sigon nga nagpanaw ro eaeaki sakay it anang motorsiklo.
Bukon suno kana it familiar sa mga residente ro itsura it suspek .
