KALIBO, Aklan—Overwhelming ro mga nabaton nga bulig it mga biktima it nag-eontad nga sunog sa Brgy. Tigayon, Kalibo pag-abot sa pagkaon ag mga eambong.
Angot kara, eubus nga ginakalipay ag ginapasaeamatan ni Punong Barangay Gil Morandante ro mga indibidwal, grupo ag ahensya it gobyerno nga nagta-o it pagkaon ag mga eambong sa anang mga constituents nga nasunugan.
Sa makaron suno kay Morandante hay ro kinahang-ean eon it mga biktima hay ro mga materyales nga makapaobra sanda it panibag-ong panimaeay nga may masilungan ro mga raya bangud nga temporaryo eamang ro andang pagdayon sa evacuation center sa nasambit nga lugar.
Nasayuran nga nagaabot sa P779,595 pesos ro danyos it sunog nga nagpa-ugdaw sa 14 nga baeay ag daywa ro partially burned nga natabo ko Lunes Santo it hapon.
