KALIBO, Aklan—Pursigido nga magpasaka it kaso ro sangka barangay kagawad it Brgy. Tibiao, Altavas matapos nga ginsampae it hilong nga eaeaki.
Ginkilaea ro tagreklamo nga si Ronnie de Pedro, 49-anyos samtang ro ginatumod nga suspek hay si Cyden De Juan, sa legal nga edad ag residente it Jamindan, Capiz.
Base sa report, nagasakay it motorsiklo si kagawad halin sa Lucero, Jamindan kat nakaagi raya sa grupo it kaeaeakin-an nga naga-inuman kon sa siin sambilog eon kara si De Juan.
May kaangtanan kara, gin-eambangan imaw it suspek ag ginkompronta kon minatuod nga sanda ro ginaturo it kagawad nga nagapang kuryente sigon it isda sa mga sapa nga sakop it Brgy. Tibiao nga insigida man nga ginpamalibaran it kagawad.
Apang, gulpi eamang sigon imaw kara nga ginsampae sa waea nga uyahon, ginturo-turo ag nagbuhi pa raya it maeain nga tinaga sa opisyal it barangay.
Bangud kara, insigidang nagpangayo it bulig sa mga otoridad si De Pedro rason nga naaresto si De Juan ag ko ulihi hay nakumpisakahan raya it kutsilyo rason nga gilayon man imaw nga gindaea sa taeatapan it pulisya kon sa siin imaw sa makaron temporaryong nakakulong para sa nagakaigong disposisyon.
