KALIBO, Aklan—Ginpasiguro ni Liga ng mga Barangay President ag Pook Punong Barangay Ronald Marte nga haum eon ro kada barangay sa banwa it Kalibo kung siin igabutang ro mga Ligtas COVID Center (LCC) engkaso nga mai-release eon ro P1,000, 000 million nga financial assistance it lokal nga gobyerno.
Suno kana, makaron hay naga-usoy pa sanda it pamaagi kung siin ibutang ro mga naga-uli nga Locally Stranded Individuals (LSIs) ag Returning Overseas Filipinos (ROFs).
Dugang pa kara nga nagpueog sigon sanda kaibahan ro Provincial Inter-Agency Task Force ko nagtaliwan nga adlaw it Lunes para maistoryahan ro spike ukon gulpyadang pagtaas it kaso it COVID-19 infection sa banwa it Kalibo.
Dikara sigon hay ginmando kanda ni Governor Florencio Miraflores nga inspeksyunon ro mga isolation facility ukon Barangay Isolation Unit sa kada barangay agud nga masikyar kung pila ro posibleng ibutang engkaso nga may magpositibong residente.
Aminado man raya nga kueang gihapon ro mga quarantine facility it banwa agud nga i-akomodar ro mga COVID-19 patient.
Ginpahayag dugang nga aprubado eon ro pondo para sa pagpatindog it dugang nga pasilidad kung siin ginahueat eon lang nanda raya nga mai-release.//
Sa pihak nga parte, gintaw-an man it punto ni Kalibo Sangguniang Bayan member Augusto Tolentino ro anang nauna eon nga ginduso nga resolusyon kaangot sa paggamit it DayCare Center it kada barangay bilang quarantine facility.
Suno kana, mabahoe kunta ro maibulig kara sa mga naga-uli nga LSIs ag ROFs ukon mga residente nga nagpositibo sa makataeapon nga sakit.
Ginpahayag dugang nga posibleng mabuhayan pa ro pag-release sa P1,000,000 million nga financial assistance it kada barangay maskin nga aprubado eon raya it lokal nga gobyerno it Kalibo.
