KALIBO, Aklan—May mabakae eon nga mga baratong bugas sa Kalibo public market base sa gintaeana nga price ceiling ni Pangueong Ferdinand Marcos Jr.
Suno kay Michael Reyes, sangka rice retailer nga ko nagtaliwan nga domingo hay may nag-abot eon sanda nga stock nga ro retail price para sa regular milled rice hay P41 kada kilo, ag P45 sa well-milled rice.
Apang bukon it tanan nga rice retailer hay nagapatuman it nasambit nga presyo bangud sa dating stock nga nabakae nanda it mahae.
Sa monitoring it Bombo Radyo, mataeupangdan nga may una pa nga presyo it bugas nga naga-abot it halin sa P50 hasta P60 kada kilo nga masyadong maeayo sa ginpromisa ni Pangueong Marcos Jr. nga P20 kada kilo ko tiempo it kampanya.
Mag-eowas kara, maeaka pa ro mga nagabaligya makaron it 41 pesos.
Ginasugid nga kaabuan sa mga nag-abot nga stock it bugas nga barato ro presyo hay naghalin sa Antique, Roxas City ag Iloilo.
Ro mga stock sigon nga nagahalin sa Aklan hay medyu mahae ro presyo.
Sa pihak nga parte, ginkumpirma ni Reyes nga owa man it mga taga-Department of Agriculture ag Department of Trade and Industry ukon DTI nga nag-monitor sa presyuhanay it andang ginabaligya nga bugas, mag-eowas sa taga-LGU-Kalibo, kun sa siin, owa man it mandu kanda nga magpanaba it presyo.
Dugang pa nga owa man it naka-abot kanda nga mga taga-gobyerno nga naghambae nga pagataw-an sanda it 15,000 pesos nga bulig pinansiyal nga mga apektadong rice retailers.
