KALIBO, Aklan—Ginkalipay it mga barbero, tag-ana it karinderya ag iba pang negosyante sa parte it Kalibo shopping center matapos nga ginpasugtan eon nga magbukas ro andang mga establisimento sa idaeum it mas haeuga nga quarantine restrictions.
Raya hay matapos nga pormal eon nga ginpatuman ko Setyembre 8 ro general community quarantine (GCQ) sa Aklan, kun sa siin ginpasugtan eon nga magbukas ro kaabuan sa mga establisimento basta 30 porsiyentong kapasidad ag masunod ro mga health protocol.
Suno sa sangka barbero nga kanya-kanya eon lang sanda nga diskarte agud nga may makaon sa sueod it daywang buean ag tunga nga sarado ro andang operasyon.
May ginpromisa man sigon kanda nga ayuda ro gobyerno probinsiyal, apang owa pa raya nag abot hasta makaron.
Samtang, ginpahayag it sangka tag-ana it karinderya nga mag-eowas sa mga customer nga naga-take-out hay nagabaton eon sanda it dine-in sa limitadong numero.
Sa pihak kara, nagapabilin nga malisod sigon ro pagpangabuhi bangud sa mahina nga kita.
