LEZO, Aklan — Narekober sa search warrant operation it Lezo Municipal Police Station ro sangka baril ag mga bala sa sangka 34 anyos nga eaeaki sa sueod it anang baeay sa Brgy. Agcawilan, Lezo, agahon it Sabado, Setyembre 27.
Ro suspek hay nakilaea kay alyas Jaime, residente it nasambit nga lugar, ag sangka ahente it baboy.
Suno kay Police Capt. Gilbert Batiles, hepe it Lezo MPS nga may record ro suspek it pagbaligya it baril kamana man ro pagpanutok ag pagpaeupok it baril.
Bangud kara, ginkasa ro operasyon it mga kapulisan sa pagserbi it search warrant nga nagresulta sa pagkadakop sa suspek ag pagka-rekober sa .38 revolver nga baril nga owa it nagakaigo nga dokumento kaibahan ro limang bala kara.
Police Capt. Gilbert Batiles, hepe it Lezo MPS
Samtang, ginpanindugan it suspek nga bukon it imaw ro nagapanag-iya it armas nga narekober ag planted eamang raya it kapulisan agud nga madum-ok sa kaso.
Suspek nga si alyas Jaime
Sa pihak nga parte, aminado si punong barangay Mark Manares it nasambit nga lugar nga may mga record sa barangay ro suspek apang bukon it angot sa gina alegar nga pagiging gun runner ag maskin ro ginasugid nga pagpanutok ag pagpaeupok it baril nana .// dugang pa nana nga antes ro eleksyon ko 2018 hay biktima it pagpang-eabu ro suspek .
Punong barangay Mark Manares
Ro suspek hay nagapangatubang sa kasong pageabag sa Republic Act 10591 ukon “Comprehensive Firearms and Ammunition Regulations Act”.
