KALIBO, Aklan — Narekober sa search warrant operation it Kalibo Municipal Police Station ro sangka baril ag mga bala sa sangka mekaniko sa sueod it anang vulcanizing shop sa Brgy. Tigayon, Kalibo, agahon it Huwebes, Marso 6, 2025.
Ro suspek hay nakilaea kay Regie Ibutnande ag residente it nasambit nga lugar.
Suno kay Police Major Frensy Andrade, hepe it Kalibo MPS nga nauna eon nga ginreklamo ro suspek it pagpanutok it baril ag pagpang-eagas it icepick.
Bangud kara, ginkasa ro operasyon it mga kapulisan sa pagserbi it search warrant nga nagresulta sa pagkadakop sa suspek ag pagka-rekober sa .38 revolver nga baril nga owa it nagakaigo nga dokumento kaibahan ro limang bala kara.
Nagapangatubang ro suspek sa kasong pageabag sa Republic Act 10591 ukon “Comprehensive Firearms and Ammunition Regulations Act”.
