Ginbombahan it barko it China Coast Guard (CCG) it water cannon ag ginitgitan ro barko it Bureau of Fisheries and Aquatic Resources (BFAR) sa may Pag-asa cay 2 ukon Sandy Cay sa West Philippine Sea kahapon, adlaw it Miyerkules, Mayo 21.
Sa sangka statement, ginkumpirma it BFAR nga nagapatigayon ro daywang barko kara nga BRP Datu Sanday ag BRP Datu Pagbuaya it routine mission kaibahan ro sangka scientific team para mangolekta it sand samples sa lugar bilang parte it maritime scientific research initiative kat matab ro panibag-ong pagpang-harass it Chinese vessel.
Suno sa ahensiya, daywang beses nga ginbombahan it water cannon ag ginitgitan it CCG vessel 21559 ro BRP Datu Sanday nga nagresulta it pilang kahalitan sa port bow ag smokestack it barko it Pilipinas kun siin nabutang sa peligro ro kabuhi it mga sakay nga sibilyan.
Dugang pa it BFAR nga raya ro unang kahigayunan nga gumamit it water cannon ro Chinese vessel kontra sa research vessel it BFAR sa may Pag-asa cays.
Sa pihak it agresibo, peligroso ag ilegal nga aksiyon it barko it China, naubra man nga makumpleto it scientific team it Pilipinas ro andang misyon sa Pag-asa Cays 1,2 ag 3.
