KALIBO, Aklan—Aminado ro sangka survivor nga si Leo Arilas nga owa nanda nakita ro pangaean it barko nga bumangga kanda bangud nga masyadong madueum ko rato nga pang-orason.
Ginapatihan nga ro barko hay sangka cargo ship bangud nga may crane raya sa ibabaw nga posibleng naghalin sa Guimaras, Iloilo ukon sa Bacolod.
Ginsaysay pa ni Arilas nga maswerteng naka-eangoy sanda paagto sa iba pang mga mangingisda rason nga natabangan sanda kaibahan si Gerald Retos.
Ulihi sigon nanda nga nakita ro namatay nga si Rex Peralta nga nagabuyot pa sa barko.
Gintinguhaan pa sigon nanda nga mausoy raya kaibahan ro mga nag rescue kanda apang bangud sa kabaskog it humbak hay owa eon nanda raya nakita.
Naghueat pa sigon sanda nga magbut-eak ro adlaw ag ginpadayun ro pag usoy apang owa gid nanda nakita.
Samtang, narekober man sigon nanda ro andang baroto nga naga eutaw eutaw nga guba eon.
