KALIBO, Aklan—Gina-imbestigahan eon it Bureau of Fire Protection ro pagkasunog it sangka baroto nga himo sa fiberglass samtang nakadungga sa kilid it baybay bandang alas-3:00 it aga-aga it Biyernes, Hunyo 14, sa Barangay Cawayan sa banwa it New Washington.
Suno kay Marlo Reyes, tag-ana it baroto nga nakibot eon lang sanda matapos nga ipahisayod it andang igkampod nga nagakasunog ro andang baroto.
Dugang pa nga antes nga natabu ro insidente bandang alas-2 it aga-aga hay magapaeawod kunta sanda it anang igmanghud, apang bangud nga nagapinangilat hay nagdesisyon sanda nga mag-uli.
Ginkabuligan pa sigon it mga pumueuyu nga matapna ro kaeayo, apang ulihi eon ro tanan.
Ginatumod pa sigon it BFP ro posibleng rason it sunog.
Apang maeayo sigon ro posibilidad nga tinamaan raya it kilat .
Sa pihak kara, mabahoe ro pagpati it pamilya nga may nagmalit sa andang baroto nga andang ginapangitan-an mag-eowas sa anang pagiging tricycle driver.
Emosyunal man nga ginpahayag ni Reyes nga ginapasa-Diyos eon lang nana ro tanan bangud nga nagapati imaw sa karma.
Raya sigon ro kauna-unahan nga kahigayunan nga may nasunog nga baroto sa andang lugar.
Kumpiyansa man nga ginpahayag ni Reyes nga owa imaw it naka-away sa andang lugar agud nga ma-tripan ro anang baroto.
Ro insidente hay nagtuga it kapin sa P20,000 nga danyos .
Ro baroto nga de-bugsay hay haeos tatlong dag-on pa eamang sa pamilya Reyes
