Sa pihak it mataas nga suweldo, maabu sa gihapon nga mga pulis ro naga-obra it maeain agud nga maka-kwarta.
Owa nalipay sa ginabaton nga sweldo ag nagaduso pa it shabu.
Ro maeain nga hilimuon ngara ro rason kon ham-an nga nagakaguba ro imahe it Philippine National Police (PNP).
Indi makabangon ro PNP maskin nga gina-obra man it hepe kara ro tanan nga pamaagi.
Mag-eowas sa pagduso it ilegal nga droga, eakot man ro mga pulis sa hulidap, kidnapping, pagpatay ag iba pang krimen.
Ko nagtaliwan nga domingo, nakakumpiska ro mga pulis it haeos sang tonelada it shabu sa Manila nga nagabalor it P6.7 bilyon pesos.
Suno kay DILG secretary Benhur Abalos, raya ro pinakamabahoe nga nadakpan nga shabu sa kasaysayan it nasyon.
Naga abot sa 990 kilos it shabu ro nakumpiska sa mga suspect matapos nga magpatigayon it buy-bust operation.
Natukiban pa nga sambilog sa mga suspek hay pulis.
Sa baylo nga imaw ro nagadakop sa drug traffickers, imaw ro nakakulong makaron.
Nakilaea ro pulis nga si PMSgt. Rodolfo Mayo, Jr., 48 anyos ag miyembro it Special Operations Unit NCR it PDEG ag taga-Guimba Nueva Ecija.
Nagabagsak ro imahe it PNP bangud sa kahimuan it mga “bugok” nga miyembro.
Nagakinahangean eon it eubusan nga paglimpyo sa PNP ag mahimo raya it presenteng PNP chief nga si Gen. Rodolfo Azurin Jr. antes raya nga magpanaog sa puwesto.
Dapat eon nga mabasag ro mga ‘‘bugok’’ agud nga masalbar ro PNP sa mas pang pagka-eugmok sa eapok.
Ipatuman man kunta it PNP nga ro mga makumpiskang shabu hay insigidang samaron agud nga indi eon mai-recycle.
Sa kaabuon it nakumpiskang shabu, posibleng may maipuslit ag uman nga maibaligya sa kalye.
Kabay nga maduea eon sa linya it PNP ro mga “bugok” nga miyembro agud nga makabangon eon sa kumunoy
