KALIBO, Aklan — Ginpasiguro it National Irrigation Administration (NIA-Aklan nga may una eon nga bastante nga supply it tubi nga pang-irigasyon sa mga kaeanasan it mga mangunguma .
Raya ro ginpahayag ni Freddie Meren, water master it NIA-Aklan .
Apang suno kana nga ro andang irrigation delivery schedule hay para pa eamang sa eastern side it probinsiya matapos nga malimpyuhan ro andang mga kanae.
Nag-apela man imaw sa mga mangunguma sa downstream ukon ubos nga parte nga maghueat-hueat anay antes nga maka-abot kanda ro tubi.
Magiging tayuyon eon sigon ro andang pagpaguwa it tubi para sa irigasyon hasta nga matapos ro makaron nga cropping bangud sa bastante nga water supply sa intake sa Barangay Sigcay, Banga .
Gindugang pa ni Meren nga mabahoe man nga bulig ro pag-uean makaron nga buean para sa andang mga pananum.
Angot kara, nag-apela imaw sa mga residente eabi eon sa mga naga-istar sa kilid it irigasyon nga indi pag-obrahon raya nga dump site ukon pieilakan it mga basura .
Ginpasiguro man kara ro pagpatigayon nanda it preventive maintenance ag pag-inspeksyon sa mga control gate it irrigation canals agud nga masiguro nga owa it maging sabeag sa pag-ilig it tubi.
