KALIBO, Aklan—Naghinyo ro mga miyembro it Banga Tricycle Operators and Drivers Association ukon BATODA sa gobyerno probinsyal it Aklan nga bukon eamang it ro mga una sa listahan ro makabaton it cash assistance nga P3,000 pesos kundi parehason sanda tanan.
Raya hay kasunod it pag-imporma kanda nga makaron nga adlaw nakataeanang iga-release sa mga benepisyaryo ro nasambit nga ayuda.
Suno kay BATODA vice president Eric De Juan, haeos tanan sanda hay apektado it pandemya bangud nga dueoeongan man sanda nga nawad-an it trabaho sa kasagsagan it pagpanaeasa it Covid-19 rason nga nagakadapat nga tanan sanda hay makabaton it bulig halin sa gobyerno probinsyal.
Ginpahayag dugang ni De Juan nga ro gina-insister nanda nga ayuda sa idaeom it Social Amelioration Program ukon SAP ag 4P’s hay ana sigon raya it national ag iba mat-a ro ana it probinsya nga imaw ro andang ginapanupod makaron.
Sa masobra 400 nga tricycle drivers sa bilog nga banwa it Banga hay 103 eamang kanda ro makabaton it financial assistance.
Suno pa kay De Juan, uwa it house to house validation nga natabo kaparehas sa hambae it Provincial Department of Social Welfare and Development ukon PSWDO nga nag-agi sa assessment and validation ro mga kwalipikadong benepisyaryo it nasambit nga cash assistance.
