KALIBO, Aklan— Nakataeanang ilunsar it Metro Boracay Police Task Force ro “Battle of the Front Beach” kontra sa mga violators sa baybayon it isla it Boracay sa maabot nga Pebrero 21 it presenteng dag-on.
Magatingob pwersa ro Inter-Agency Task Force ag pulisya para sa Project BESST ukon Boracay Enhanced Security Strategy and Tactics agud matutukan ro anti-littering, smoking, ambulant vendors, sex workers ag illegal tour guides sa sikat nga isla.
Suno kay PSupt. Ryan Manongdo it MBPTF, katuyuan it nasambitang proyekto nga maging “Discipline Zoned Boracay” ro isla kaparehas it iba pang mga tourist destination.
Sa pihak sigon it masobra sa 130 enforcers ro nakakalhit sa front beach hay may-una gihapon nga naga-eabag sa ordinansang ginapatuman it Local Government Unit (LGU)-Malay.
Kampante man ro pulisya nga inde raya makaangkon it anumang issue bangud ro mapabahin nga mga pulis hay may kanya-kanyang suksok nga “action camera” ag tanan nga pagahimuong tikang hay dokumentado.
