KALIBO, Aklan—Uman nga nagpadumdom ro Provincial Health Office (PHO) sa pagbawae it nagkaeain-eain nga paeupok.
Suno kay Dr. Vic Sta. Maria it PHO-Aklan, target makarun it andang taeatapan nga makalista it “zero incident” it mga firecracker-related injury sa selebrasyon it holiday season.
Raya nga anunsyo hay kasunod it kampanyang “Oplan:Iwas Paputok, Fireworks Display ang Patok! Para sa nagahilapit nga Kapaskwahan ag Bag-ong Dag-on.
Sandig man sa Executive Order no. 28 ukon ro hugot nga pagbawae sa pagpaeupok rason nga nagapati ro PHO nga mangin madinaeag-on ro andang kampanya.
Sa idaeum it Executive Order, ginapasugtan eamang ro paggamit it paeupok sa mga community fireworks display para mabuhinan ro insidente nga posibleng mag-euntad bangud sa paeupok.
Gin-enganyo man kara ro publiko nga gumamit it mga alternatibong pampa-sangag imbes nga gumamit it paeupok sa pagselebrar it Bag-ong dag-on kung sa siin ginabutang eamang sa delikado ro sitwasyon it mga tawo, sapat, ag palibot
Ginpahayag dugang nga mas mayad pang ibakae it mga pomoeoyo it pagkaon ukon handa sa selebrasyon ro kwarta nga pambakae it paeupok.
Gin-suhestiyon pa kara it andang taeatapan nga ro tanan hay pwedeng tuhugon ag ubrahong tambourine, ro mga lata hay pwedeng butangan it mga bato ukon toe-an para mangin masangag, ro mga takop it kaldero hay pwedeng ubrahong simbalo ukon cymbals, ag may nabaligya man nga torotot nga pwedeng huypon ag patunugon.
