KALIBO, Aklan—Owa ginapasugtan ro pagpangampanya eagi pagkatapos magdihon it andang mga certificate of candidacy (COC) ro mga nagahandum nga magpadaeagan sa May 12, 2025 midterm elections umpisa Oktubre 1 hasta 8.
Ginpaathag ni Atty. Dennis Ausan, direktor it Commission on Elections (Comelec) Western Visayas nga ro campaign period para sa mga kandidato sa nasyunal nga posisyon hay maga-umpisa 90 diyas antes ro eleksyon, samtang ro mga lokal nga kandidato hay may 45 diyas para mangampanya.
Ro campaign period para sa mga lokal nga kandidato hay maga-umpisa sa Marso 28, 2025 hasta Mayo 10, 2025, samtang ro para sa mga national position hay sa Pebrero 11, 2025 hasta Mayo 10, 2025.
Sa pihak kara, gin aku ni Ausan nga owa it partikular nga laye nga hayagan nga nagabawae it pagpangampanya sa guwa it gintaeana nga tiempo.
Ko Abril 2024 ginpatuman ro mga patakaran sa premature campaigning matapos magdihon it andang COCs ro mga kandidato para sa 2025 elections.
Ginakabig sigon it Comelec nga mga opisyal nga kandidato ro tanan nga nag-file it COCs.
Dugang pa ni Ausan nga bukon it raya ro unang kahigayunan nga magapatuman it makarondaya nga mga tikang ro Comelec sa ideaum it pagdumaea ni chairman Erwin Garcia.
Ko 2023 nga Barangay ag Sangguniang Kabataan Elections, nagpaguwa ro Comelec it mga show cause order sa 7,500 kandidato bangud sa temprano nga pagpangampanya kun sa siin 253 sa raya ro nadiskwalipika samtang nagahueat pa it resolusyon ro iba sa andang mga kaso.
