NATIONAL News — Ginkumpirma ni dating Philippine Charity Sweepstakes Office general manager Royina Garma nga naga-abot it halin sa P20,000 hasta sa P1 milyon ro cash reward sa kada mapatay sa war on drugs it nagtaliwan nga administrasyon.
Raya ro naging pahayag ni Garma kat pangutan-on ni Kabataan party-list Rep. Raoul Manuel para kumpirmahon kun may una nga padya nga P50,000 para sa drug pusher, P100,000 para sa big time drug pusher, P300,000 para sa narco politicians ag protectors, ag P1 milyon para sa mga trader, manufacturer, chemist, ninja cops ukon financiers.
Suno kana nga owa nana nasayuran ro ensakto nga presyo it bayad sa kada mapatay sa drug war apang ginpahayag nana nga ro pinakamataas hay naga-abot sa P1 milyon.
Dugang pa nga si dating police officer Edilberto Leonardo ro nagadumaea sa pondo para kara.
Bilang sabat, ginpahayag ni Manuel nga bukon it makangawa-ngawa nga ro mga pulis sa idaeum it administrasyong Duterte hay masyadong excited nga ipatuman ro war on drugs.
“Kaya naman pala ganado yung mga sangkot na mga pulis na kapag neutralization talaga, ang layunin ay pumatay, dahil pala ganon kalaki yung reward sa kanila,” pahayag ni Rep. Manuel.
Owa pa it sabat ro kampo ni Duterte sa mga alegasyon ni Garma.
