KALIBO, Aklan — Bukon it pabor ro Bagong Alyansang Makabayan ukon BAYAN-Aklan sa uman nga pagduso ni Pangueong Rodrigo Duterte sa penalidad nga kamatayon para sa mga eakot sa drug trafficking ag plunder.
Suno kay Kim Sin Tugna , OIC provincial coordinator it BAYAN-Aklan nga owa it kredibilidad ro Duterte administration sa uman kara nga panawagan sa revival it death penalty bangud nga sanda mismo ro nagpahilway sa mga kawatan it gobyerno kapareho ni dating Pangueong Gloria Macapagal Arroyo ag pilang mga dating senador nga naeakot sa binilyong piso nga pork barrel scam.
Mag-eowas kara, naeakot man sigon ro unga it presidente nga si Cong. Paolo Duterte sa kontrobersiyal nga P6.4 million nga balor it shabu nga ginpaeusot sa nasyon .
Kamana man nga naduea eon ro isyu sa mga drug lord ag protector nga maeapit sa presidente.
Sa pihak kara, nagapanindugan sigon ro BAYAN-Aklan nga mga pigado gihapon ro maapektuhan kara.
Nagapati sanda nga indi makaresolba ro death penalty sa mga nagapangunang problema it nasyon .
Sa baylu, kinahangean sigon nga i-review anay ro sistema it hudikatura sa nasyon.
