KALIBO, Aklan—Ginpukaw it Bagong Alyansang Makabayan ukon Bayan-Aklan ro igtueopangod it gobyerno nga pabaskugon ro healthcare system it nasyon sa tunga it COVID-19 pandemic.
Suno kay Kim Sin Tugna, OIC Coordinator it Bayan-Aklan nga mabuhay eon nga tyempo nga naga-antus ro mga pumueoyo sa nasyon bangud sa mahina nga kalidad it serbisyo it mga ospital para sa ikaayong eawas it mga pumueoyo.
Maskin ro mga healthcare worker suno kana hay naga-aray eon man bangud sa kakueangan it benepisyo para sa andang indi matupungan nga serbisyo sa tunga it pakikipagsukoe it nasyon sa pandemya.
Ginhangkat pa kara ro gobyerno nga i-angat ro healthcare system agud nga mabawasan ro gina-antus nga kalisod it mga pigadong pumueoyo.
Kung nahimo sigon it gobyerno nga pataasan ro sweldo ag dugangan ro kagamitan ukon pasilidad it pilang ahensya kapareho it Philippine National Police ag Armed Forces of the Philippines dapat nga mahimo man raya sa mga medical facility bangud nga raya ro eubos nga kinahang-ean it tanan.
