KALIBO, Aklan—Ginbatikos it Bagong Alyansang Makabayan ukon Bayan Aklan ro gobyerno bangud sa kawad-an it ayuda sa sektor it transportasyon nga sambilog sa mga eubus nga naapektuhan it Covid-19 pandemic.
Suno kay Kim Sin Tugna it Bayan-Aklan nga owa pa man natapos ro mga problemang inagihan it mga public utility vehicle drivers daea it pandemya, may panibag-ong hangkat eon man sanda nga ginapangatubang, ro pagtaas it presyo it gasolina.
Raya ro posibleng rason suno kana kon ham-an nga owa eagi nagpanaba it pamasahe ro mga raya maskin nga gin-obra eon nga 70 porsiyento ro seating capacity halin sa dating 50 porsiyento sa mga pampasaherong saeakyan.
Apang may pilang drivers suno kana ro nagatau it konsiderasyon eabi eon ro naka-eubot sa sitwasyon.
Ginhalimbawa pa ni Tugna ro gintau nga Assistance to Individuals in Crisis Situation ukon AICS it DWSD sa mga drivers, apang bukon it tanan hay nakabaton.
Gin-insister pa kara nga dapat nga mag-demand ro mga drivers sa gobyerno agud nga itau eon ro ginpromisa nga subsidiya kanda.
Owa man it rason suno kana nga makaangkon it bagina ro mga commuters ag transport sector sa baylo hay dapat nga maghugpong agud nga makahimo it win-win solution ukon desisyon nga maging paborabli sa tanan.
Nagapati man ro Bayan-Aklan nga bukon it bastante ro bulig nga ginatau it gobyerno bukon eamang sa driver kundi sa iba pang sektor sa haeos daywang dag-on nga pandemya.
