KALIBO, Aklan—Uman nga nagpaabot it andang pagkontra ro grupong Bagong Alyansang Makabayan ukon Bayan-Aklan sa sigidas nga pagtinaas it presyo it produktong petrolyo sa nasyon.
Suno kay Kim Sin Tugna, OIC Provincial Coordinator it Bayan-Aklan nga makaangkon raya it domino effect partikular eun nga pagaeauman hay ro pagtaas it presyo it mga baeak-eon.
Posible man nga magapataas it pamasahe ro mga driver’s it pampublikong transportasyon.
Bangud kara, ginpunto pa ni Tugna nga bukon it sabat ro mataas nga pamasahe sa nagatinaas nga presyo it gasolina sa baylo hay dapat nga i-regulate it gobyerno ro presyo it mga oil companies.
Sa pihak kara, nagapabilin man sigon nga palpak ro naging tikang it gobyerno.
Inutil man sigon ro mga programa it administrayon ni Pangueong Rodrigo Duterte ag owa it may naibulig para sa sitwasyon it mga pobreng pomoeuyo.
