KALIBO, Aklan–Hugot ro panawagan makaron it Bagong Alyansang Makabayan ukon Bayan Aklan nga ita-o eon sa mga senior citizen pensioner ro ginaduso nga P1,000 pesos nga ayuda kada buean halin sa gobyerno.
Suno kay Mr. Kim Sin Tugna, provincial coordinator it Bayan Aklan nga sa makaron nga tyempo nga nagakabuhi kita kaibahan ro pandemya hay nagakadapat eon nga iimplementar ro nasambit nga panawagan para sa mga vulnerable nga mga katigueangan partikular sa mga uwa it nagasuporta sa andang pang adlaw adlaw nga kinahang-eanon.
Mabahoe sigon nga bulig ro sang libong peso para sa mga kwalipikadong pensioner bangud nga mag-eowas nga makabakae ro mga raya it pagkaon hay mabakae pa nanda ro bueong nga maintenance nga eubus nga kinahang-ean it andang eawas.
Inde eon dapat pag idingot sa mga katigueangan ro mabuhay eon nanda nga ginaduso bangud nga ro limang gatos nga presenteng pension hay kueang nga mayad para sa sueod it sang buean nga gastuson.
