KALIBO, Aklan—Suportado it grupong Bagong Alyansang Makabayan ukon BAYAN-Aklan ro panawagan it transport group nga PISTON para sa transport strike sa Setyembre 29 ag 30, angot sa padayun nga pagtaas it presyo it produktong petrolyo.
Angot kara, gin-engganyo ni Kim Sin Tugna, provincial coordinator it BAYAN-Aklan ro transport sector, mangunguma, mangingisda, urban poor, commuters ag consumers sa Aklan nga magbuylog sa nasambit nga paghueag agud nga ipanawagan sa national government ro pagbasura sa Republic Act No. 8479 ukon Oil Deregulation Law ag ipapundo ro giyerang agresyon it US ag Israel sa Iran.
Nagapanawagan man ro grupo sa pagbo-oe it 12% VAT ag excise tax sa produktong petrolyo, nga suno kay Tugna hay makabulig agud nga mabawasan ro epekto it mataas nga presyo it langis sa mga motorista, drivers, commuters ag iba pang consumer.
Nauna kara, gin-kwestiyon man it grupo ro paggamit it emergency powers it gobyerno para sa fuel tax relief, ag ginpamilit nga nagakinahangean sigon it mas mabuhayan nga tikang sa atubang it padayun nga pagtaas it presyo it langis.
