KALIBO, Aklan—Nagapanawagan ro bagong alyansang Makabayan ukon Bayan-Aklan nga importanteng pabaskugon it gobyerno ro healthcare system it nasyon agud nga masiguro ro kahauman sa mga pandemya nga maga-abot kapareho it nagapanaeasa makaron nga coronavirus disease 2019 ukon covid 19.
Suno kay Kim Sin Tugna, Provincial Chairperson it Bayan-Aklan nga makita ro mabahoe nga epekto it pandemya sa paghatud it healthcare services sa mga pumueuyu eabi pa ag limitado ro hueag it mga tawo.
Ginsuhestiyon pa kara ro pagtaeana it mabahoe nga pondo para sa kinahangeanong medikal may pandemya man ukon owa.
Ro problema sigon hay mas mabahoe pa ro gintaeana it gobyerno sa intelligence fund kaysa sa healthcare services.
Mag-eowas kara, nagakinahangean man suno kana it maayos ag maeapad nga health facilities. Partikular ro pasilidad para sa mga covid patients agud nga maprotektahan ro mga medical frontliners eabi eon ro mga nurses ag mga doctors.
