Naghiwat it maeapnagon nga hubeag protesta ro Bagong Alyansang Makabayan (BAYAN) Aklan kahapon nga adlaw it Byernes, Hunyo 12, kadungan it pagselebrar it Araw ng Kalayaan para ipanawagan ro minatuod nga kahilwayan, demokrasya sa ekonomiya, ag pambansang soberanya.
Suno kay Kim Sin Tugna, tagapaghambae it nasambit nga gupo, tuyo nanda nga ipamilit ro isyung pang-ekonomiya it nasyon, kaibahan ro pagbahoe it utang it Pilipinas ag ro kawad-an sigon it bastante nga industriya para maproseso ro mga likas nga yaman it nasyon.
Ginpunto man nanda ro padayon nga pagigin import and export dependent it Pilipinas imbes nga taw-an it atensyon ag pabaskugon ro lokal nga produksyon.
Gintawag man nga ‘inutil’ ni Tugna ro gobyerno pag-abot sa pagsuporta sa mga manguguma bangud sa padayon nandang pag-atubang sa mataas nga gastos apang manaba nga kita.
Pahayag dugang nana nga dapat repasuhon ag ibasura ro mga sueundanan nga naga-sandig eamang sa interes it gobyerno ag dumueuong nga kapitalista.
