KALIBO, Aklan—Nagpatigayon it rally sa atubang it taeatapan it Commission on Election ukon Comelec Aklan ro grupong Bagong Alyansang Makabayan ukon Bayan Aklan.
Raya hay agud nga ipanawagan ro ginasugid nga dayaan sa transmission it data sa boto sa nagapadayon nga hueoyapan sa kakatapos eamang nga 2022 eleksyon sa tunga it hugot nga magkaengkwentro sa pagkapangueo nga si vice president Leni Robredo ag dating senador Ferdinand “Bongbong” Marcos Jr.
Base sa KBP and Bombo Radyo quick count partial and unofficial result, si Marcos hay nakabueo eon it 31 milyon nga boto samtang si Robredo hay naeansang sa masobra 14 milyon votes.
Suno kay Kim Sin Tugna, provincial coordinator it Bayan Aklan, haeos magkapareho ro percentage it boto nga nagaguwa sa resulta apang sa aktwal nga numero hay dehado nga mayad ro bise presidente.
Posible sigon nga may kamaea-maeahan nga natabo sa eleksyon bangud nga kaalyado it Marcoses ro komitiba sa electoral sa senado kamana man ro provider it VCM nga smartmatic hay si Dennis Uy nga maeapit nga abyan ni Pangueong Rodrigo Duterte.
Gin-insister dugang ni Tugna nga ro waea-tuo nga pagkaaberya it mga makina sa kasagsagan it botohan sa nagkaeain-eain nga probinsya sa bilog nga nasyon hay posibleng sambilog sa mga stratehiya sa pagpangibabaw makaron ni Marcos.
Inde sigon maitago ro bulok nga track record it Marcoses rason nga sambilog sanda sa nagapanawagan nga i-reject ro pagpungko ni Marcos bilang presidente it nasyon.
