KALIBO, Aklan—Suportado it militanteng grupo ro naging desisyon ni Pangueong Rodrigo Duterte nga pagbasura sa Visiting Forces Agreement ukon VFA sa Estados Unidos.
Suno kay Kim Sin Tugna, provincial coordinator it Bagong Alyansang Makabayan ukon Bayan Aklan nagakabagay eamang ro pag-terminate sa VFA.
Makabig eon sigon raya nga long overdue ukon kato pa dapat nga ginbasura.
Apang may posibilidad pa sigon nga mabag-o ro desisyon ag uman nga maibalik ro VFA.
Raya hay bangud nga magahueat pa it 180 diyas antes nga maging epektibo ro pag-terminate kara ukon ro ginatawag nga transition period.
Madumduman nga ko Martes it hapon hay pormal nga ginbaton ro dokumento it deputy chief of mission it US Embassy in the Philippines’.
Nasayuran nga nagsangag ro pagbasura sa VFA matapos nga nagpaandam si Pangueong Duterte sa mga opisyal it Amerika nga dapat nga magpaathag sa pag-revoke sa visa it anang kaalyadong si Senator Ronald dela Rosa.
Samtang, ginpahayag pa it militanteng grupo nga bukon it angay ag bagay ro tikang ni Duterte kon ro anang rason hay bangud sa pagkansela sa visa ni Dela Rosa.
Sa pagkabasura it VFA, indi eon makapatigayon it joint exercises sa tunga it US ag Philippine militaries nga ginatawag nga “Balikatan Exercises,”.
Mag-eowas sa pagbasura sa VFA, gusto man it Bayan-Aklan nga duea-on ro Mutual Defense Treaty ag Enhanced Defense Coorperation Agreement (EDCA) bangud sa mga pag-eabag kara sa soberenya ag kinamatarung it mga pumueuyu.
