KALIBO, Aklan—Kasunod it ika-8 nga anibersaryo it pagpanaeasa ni Super Typhoon Yolanda hay uman man nga ginbatikos it Bagong Alyansang Makabayan ukon Bayan-Aklan ro naging tikang it gobyerno para sa mga naging biktima it nasambitan nga kalamidad.
Suno kay Kim Sin Tuga OIC Provincial Coordinator it Bayan-Aklan nga waeong dag-on eun ro nagtaliwan apang owa sa gihapon naipaabot it husto sa mga pomoeuyo ro pundo para kanda agud nga mabuligan nga uman nga makabangon maghalin sa grabeng epekto kara.
Dugang pa kara nga nag-eapnaag man ro korapsiyon maghalin sa barangay level hasta sa national ko tiyempo it pagpanudpod it 10,000 pesos nga assistance para sa partially damage ag 30,000 pesos para sa totally damage.
Samtang ro pabaeay man hay owa sa gihapon naitao sa tanan nga mga benipisyaryo.
Kun madumduman, sambilog ro Bagyong Yolanda sa mga mabaskog nga bagyo nga nag-igo sa Pilipinas.
May una rayang nailistang 300 kilometros kada oras nga kadasigon nga paghuyop it hangin.
Ro probinsiya it Aklan hay sambilog man sa nakaekperyensiya it kabaskog ni Yolanda kung sa siin maabo nga panimaeay ro nasamad ag maabong pumueuyo ro naging apektado.
