KALIBO, Aklan—Dismayado ro grupong Bagong Alyansang Makabayan ukon Bayan Panay sa uman nga pagpaiway it Barangay ag Sangguniang Kabataan Election ukon BSKE nga igapatigayon kunta sa Nobyembre 2 it presenteng dag-on.
Suno kay Bayan Panay secretary general Elmer Forro, bukon it makatarungan ag nakakadismaya ro aksyon ag naging desisyon ni Pangueong Ferdinand Marcos Jr. bangud nga ginboe-an sigon nana it kinamatarong ro mga pumueoyo nga bomoto it nagakadapat nga ibutang sa pwesto nga maging pinuno it andang komunidad.
Dugang pa nana nga majority it publiko hay gusto eon nga bayluhan ro andang mga lider bangud sa eapnaag nga anomalya ag korapsyon.
Bangud sa ginpirmahan nga bag-ong laye, magapabilin suno kay Forro ro mga ganid nga barangay officials hasta sa Nobyembre 2028.
Madumduman nga ginpirmahan ni Pangueong Marcos Jr. ro Republic Act No. 12326, nga opisyal nga nagataeana it limang dag-on nga termino it pagpanerbisyo para sa mga opisyal it barangay ag mga miyembro it Sangguniang Kabataan (SK).
Gin-insister it Punong Ecutibo nga ro mas mahabang termino hay nagatao it kahigayunan sa mga lokal nga pinuno nga tapuson ro mga naumpisahang programa ag solusyunan ro mga nagapangunang kinahang-eanon it mga komunidad, pamilya, ag pamatan-on.
