KALIBO, Aklan—Gindepensahan it grupong Bayan Panay ro andang mga miyembrong jeepney driver nga sambilog sa mga nadakpan sa maeapnagong operasyon it Land Transportation and Franchising Regulatory Board ukon LTFRB ag Land Transportation Office ukon LTO sa syudad it Iloilo.
Suno kay Bayan Panay secretary general Elmer Forro, insigidang ginpaabot it grupo ro andang concern sa pamunuan it LTFRB matapos nga pito sa andang mga kaibahan ro naapprehend sa violation nga unregistered ro ginamaneho nga saeakyan matapos nga uwa narehistro ro andang mga prangkisa.
Depensa ni Forro, mismong ro gobyerno ro uwa naila magrehistro kanda bangud sa compulsory consolidation sa idaeom it Public Utility Vehicle Modernization Program ukon PUVMP nga suno kana hay palpak nga programa.
Angot kara, nakaangkon sigon it hinun-anon sa magtimbang nga kampo ag mismong ro gobyerno magabulig sa mga traditional jeepney driver nga mairehistro sanda sandig man sa mga nauna eon nga nakasugtanan bangud nga maabo gihapon ro mga traditional jeepney nga nagalagare sa mga nagapangunang karsadahon sa rehiyon kon ikumpara sa modernong jeepney.
