KALIBO, Aklan—Uman nga ginpanindugan it grupong Bagong Alyansang Makabayan ukon Bayan Panay nga uwa sanda nagapamaeabag sa jeepney modernization program it gobyerno kundi ro andang gina-indian eamang hay ro compulsory consolidation kon sa siin maabo ro nagapamalibad nga inde nanda masarangan ro presyo it modernong jeepney.
Suno sa kay Elmer Forro, secretary general it nasambit nga grupo nga bukas sanda sa mga hinun-anon ag pilang ka mga offer agud nga mapahagan-hagan ro kabug-at sa baeatyagon it mga jeepney drivers and operators nga uwa naila magpaconsolidate sa andang mga jeepney.
Padayon sigon nanda nga pagasuportahan ro mga nagaapela nga ipabilin ro individual franchise.
Bangud kara, welcome development para sa nasambit nga grupo kon minatuod gidman ro tanyag it dating gobernador it Ilocos Sur nga magatao it suporta sa mga jeepney driver ag makaangkon it masarangan nga presyo it electronic jeepney.
Nasayuran nga ro mga modernong jeepney hay ginakabig nga mabahoe nga tikang halin sa tradisyunal nga mga jeep nga nagatanyag it mas mataas nga kapasidad, kasoehayan ag mas manabang epekto sa palibot samtang ginapabilin ro mga visual nga aspeto nga kaparte it kulturang Pilipino.
