KALIBO, Aklan — Ginpaathag it Philippine Red Cross Aklan Chapter nga kon ano kabahoe ro naibulig it blood donation sa mga nagakinahangean bangud nga naka-eowas it kabuhi it ibang tawo, maabu man nga benepisyong medical ro mga indibidwal nga naga-donate it dugo.
Suno kay Ace Phil Feliciano it PRC-Aklan nga base sa pagtuon, ro mga naga-donar it dugo hay naga-angkon it healthy nga tagipusuon.
Raya hay bangud nga ginapanaba kara ro peligro sa pag-angkon it heart disease ag heart attack.
Ginabawasan sigon kara ro nakabara sa gina-iligan it dugo sa tagipusuon.
Sa pag-donate it dugo hay naga-improve ro overall cardiovascular health bangud nga naganaba ro kaabuon it cholesterol butang nga maprotektahan ro tagipususon sa anumang heart disease.
Suno kana nga ro eawas it donor hay insigidang ginabayluhan ro naduea nga dugo it bag-ong blood cells.
Manaba man ro peligro nga mag-develop ro cancer ag nagapabilin nga maayos ro liver, naga-burn it calories, ag iba pa.
Dugang pa nga nagahaba man ro kabuhi it mga tawong naga-donate it dugo bangud sa kaabuon it mga medical benefits kapareho it pagnaba it oxidative stress sa blood vessels.
Pwede sigon nga maituead ro blood donation sa pagpa-change oil it mga saeakyan.
Sa pihak nga parte, ginapasaeamatan man it Philippine Red Cross ro pagpatigayon it dag-unan nga Dugong Bombo nga may temang “A Little Pain, A Life to Gain” kada buean it Nobyembre.
Ginpahayag ni Feliciano nga masyadong “timing” ro blood letting event it Bombo Radyo Philippines sa Nobyembre 15 bangud nga kada magsueod ro ‘ber months’ hay ginakabig man raya nga “lean months it dugo”.
Raya sigon ro mga buean nga manaba ro supply it dugo bangud nga sangkiri ro mga naga-donate, apang mataas ro demand.
Raya hay bangud sa mga waea-tuo nga okasyon bangud sa holiday season ag pagtuhaw it mga kalamidad.
Kaeabanan sigon nga ginapabaskog nanda ro blood donation sa raya nga paniempo agud nga masabat ro pagkinahangean.
Sa Bombo Radyo Kalibo, pagahiwaton ro Dugong Bombo sa NVC gym sa Capitol Site, Kalibo.
