Agud nga makatipid sa gaeastuson, gindesisyunan it horse trainer nga si Stephanie Kirschner nga kalesa eon ro gamiton nga saeakyan agud nga magbiyahe halin sa anang baeay paagto sa anang rancho sa Schupbach, Germany.
Suno sa 33- anyos nga si Kirschner, nagbahoe ro gaeastuson sa pagpadaeagan it anang rancho bangud sa pagtaas it presyo it gasolina.
Agud nga makatipid sa kwarta, gindesisyunan nana nga indi anay paggamiton ro anang SUV ag mga kabayo anay ro anang gamitong mode of transportation.
Base sa anang kalkulasyon, nakakatipid imaw it masobra sa 250 euros ukon katumbas it P14,200 pesos sa sang buean kon kalesa ro anang ginasakyan.
Suno kay Kirschner, may mga kabaylo nga inconvenience ro paggamit it kalesa kapareho it naga-abot it sang oras ro anang biyahe paagto sa trabaho kumpara sa 15 minute drive sa anang SUV.
Indi man imaaw makaparada sa mga parking lot kon gusto nana nga maghapit sa supermarket ukon shopping mall.
Apang suno kana nga sangkiri nga sakripisyo ro mga raya kumpara sa grabeng presyo it gasolina.
Nagaeaum imaw nga maga-abu pa ro magagamit it kabayo agud nga maisipan it mga establisimento nga mag obra it parking space para sa mga kalesa ag kabayo.
